Објавен третиот том на „Визуелна хроника на македонскиот стрип“

Како проект од национален интерес во културата за 2021 година, поддржан од Министерството за култура, деновиве од печат излезе третиот том на публикацијата „Визуелна хроника на македонскиот стрип“. Автор на ова енциклопедиско издание е Александар Стеванов, графички дизајнер, стрип-сценарист и хроничар на македонскиот стрип. 

Преку изданието, Стеванов прави опширен хронолошки приказ на домашната стрип-сцена и издаваштво од периодот 2008 – 2011 година. Потврдувајќи дека македонскиот стрип е факт, во него се прикажани околу 240 хронолошки единици, како што се објавени стрипови, одржани стрип-работилници, учества на стрип-фестивали и освоени награди.

Како и во случајот со претходните два тома, кои го опфаќаат периодот 1990 – 1999, односно 2000 – 2007, и овој е со формат А4 и има 60 колор страници. Илустрацијата од корицата на оваа трета „Визуелна хроника на македонскиот стрип“ е дело на ликовниот уметник Дарко Богданов од Виница, односно претставува панел од неговиот стрип-албум „Модус вивенди“.

Покрај тритомното издание „Визуелна хроника на македонскиот стрип“, Стеванов е автор на сценаријата на неколку албуми, како и на книгата „Жељко Книвалд“ посветена на авторот на првиот стрип создаден и објавен на македонско тло. До крајот на годината, во негово авторство се очекува да излезе уште една публикација на тема деветта уметност. 

 

Објавено и на (Time.mk, Grid):

• „Објавен третиот том на ’Визуелна хроника на македонскиот стрип‘“, МИА
  
• „Објавен третиот том на ’Визуелна хроника на македонскиот стрип‘“, 24 Инфо
• „Објавен третиот том на ’Визуелна хроника на македонскиот стрип‘“, МКД.мк
• „Објавен третиот том на ’Визуелна хроника на македонскиот стрип‘“, Република
• „Објавен третиот том на ’Визуелна хроника на македонскиот стрип‘“, MakPress