Главната забелешка на грчката дипломатија е...

Во врска со грчкото протестното писмо за порта "Македонија", Нова Македонија и уште неколку други медиуми известија дека меѓу другото е и поради прикажаното шеснаесетзрачно сонце (т.н. Сонце од Кутлеш/Вергина) на истата:

Нови протести - стара приказна (Нова Македонија, 28.1.2012, Владимир Мијановиќ):

Најновата протестна нота од Грција, овој пат испратена по повод релјефите на портата „Македонија“, се надоврзува на поранешните аргументи што ги користеше Грција обвинувајќи нé за антиквизација. Сепак, нотата ќе биде сериозно разгледана и наскоро ќе има и официјална реакција, велат од Министерството за надворешни работи. Според МНР, главната забелешка на грчката дипломатија е наводното користење на сонцето од Кутлеш на портата „Македонија“. Во демаршот на грчкото МНР, предаден од амбасадорката во Скопје Александра Пападопулу, се протестира и поради „континуираното извртување на историската реалност и провокативните чекори што Скопје ги презема против Атина“.

Наградно прашање: каде по ѓаволите е прикажано сонцето од Кутлеш на портата "Македонија"?

Јас, а и уште неколкумина мои пријатели кои ги консултирав не успеавме да го најдеме. Предлагам Владата како туристичка атракција да воведе игра - пронајди го сонцето од Кутлеш, со специјален попуст за Грци.

Второ наградно прашање: дали грчките власти имаат проблеми со видот или со умот?

Ако и вие сакате да се обидете да го најдете овој симбол на портата "Македонија", и да дадете свој допринос за разоткривање на оваа мистерија, повелете фотографии има овде.