Нова држава на местото на Република Македонија

Колумна со наслов „Нова држава на местото на Република Македонија“ (Нова Македонија 20.3.2012) на Мирка Велиновска од која го издвојувам следниот дел:

Оти, да не се лажеме, прифаќањето ново име значи бришење на историските факти од 1944 година до денес, а со тоа и уривање на државните темели. Формирањето нова балканска држава ги актуализира и ги прави реални аспирациите на големоалбанските идеолози и стратези што имаат свои побарувања на сметка на оваа Република Македонија. Ама и на другите соседи. Што ако во таква ситуација политичарите-Албанци кажат дека не сакаат да бидат дел од новата држава? Повод лесно може да се искреира, што видовме и во изминативе месец-два.

А за тоа колку многу се согласувам со овој нејзин став дека евентуално ново име ќе значи и бришење на оваа држава во која живееме и поставување на нова држава на нејзино место, ќе се самоцитирам (16 јуни 2009):

Мојот став е дека доколку дојде до преименувањето на РЕПУБЛИКА МАКЕДОНИЈА по автоматизам тоа ќе доведе и до исчезнување на земјата во која живеам и до промена на мојот идентитет... Доколку се стигне до промена на името, а со самото тоа и до промена на мојот идентитет и идентитетот на сите мои сограѓани, уште сега Ви најавувам дека во тој момент ќе сторам се што е во моја моќ за да Ве спречам. Затоа што од тој момент јас ќе бидам човек без идентитет и граѓанин без држава, кој во никој случај нема да припаѓа на таа нова држава со ново име. Јас сум и ќе останам лојален граѓанин на РЕПУБЛИКА МАКЕДОНИЈА и ќе сторам се што сметам дека е неопходно за да го спречам преименувањето, а со тоа да го спречам и уништување на државата на која и припаѓам. Оние кои ќе се осмелат да ја уништат нашата држава РЕПУБЛИКА МАКЕДОНИЈА и на нејзино место да инсталираат некоја нова земја со ново име ќе ги сметам за окупатори.